سَرْوَالْ لَفْجَرْ .. في الزجل المغربي

بقلم عبد المجيد موميروس
☆
تْزَعْلَلْ .. أَ لَحْرَيَّفْ،
بِينْ رْدَافْ:
مُولَاتْ .. زْوَيَّفْ.
هَازَّة هَازَّة!
نْتُومَا مَّالِينْ لْخِيرْ ..
وَنَا .. غَ نَهْتَرْ،
ݣولُو .. اللهْ يَسْتَرْ.
سَرْوَالْ .. لَفْجَرْ،
فِيهْ بْقاعِي!
مْطَبَّعْ .. بْ لَحْمَرْ،
ݣالُو .. دْيالْ لَقْمَرْ.
مْيَالَتْ صِّينِيَّا؛
زْلَݣْ .. قالَبْ سَّكَّرْ.
سَّݣطَة تَّالْتَة؛
حْلَا .. مْنَ تْمَرْ،
نَسَّاتْنِي؛
فْ ݣاعْ .. زْمَرْ.
طَالَبْ لَعْفُو؛
يَا رَبْ تَّكْوِيرْ ..
كِ هْنا كِ لْهيهْ،
أنَا مَاشِي .. عَادِي.
فَ “شَّانْ زِيلِي زِيهْ”،
أنَا مْدَرَّمْ .. غادِي.
ڤَّاوْ بْلَا ضْوَاوْ!
مُولَاتْ سَّرْوَالْ .. كَ تْنَادي.
مَ نْخافْ مَ نَدْهَشْ،
ݣَعْمَا نَدْهَنْ سِّيرْ ..
يَوَدِّي سِيرْ ..
ݣَعْلَا يْسِيرْ ..
زْݣا وَ لْݣا؛
جَاتْ .. وْقَاتِي.
حْبَسْ .. بَلَّاتِي،
أَ حُلْم .. حْيَاتِي،
تْفَرّجْ:
أَشْ غَ نْديرْ ..
غَ نْخَلِّي:
شِّيطَانْ .. مْتَكِّي،
مَقْرُوضْ يَغْلِي؛
يَنْحُطْ .. يَبْكِي،
عْلَ ݣْرَانُو .. يَشْكِي.
لْمُؤَامَرَا سُوسَة،
تَاكُلْ لْوَعْي صَّغيرْ ..
عَدَا عَدَا؛
لْفَلْكْ كَ يْدُورْ،
وَلَا مَخْلُوقْ .. مَرْتَاحْ!
إبْليسْ لْمَنْضُورْ،
يَتْغَبَّنْ .. نَوَّاحْ!
مَ طَفْرُوشْ بَ تَّغْريرْ ..
وَهَوَّاوْ؛
غَ نْطَلَّعْكُمْ لْفُوݣْ،
مَ نْرَجْعُوشْ .. لُّورْ!
لَا خَلَفْ لَا سَلَفْ،
وَلَا حَدْ .. مَعْدُورْ!
إلَّا لْعَبْد سَّبَّاحْ،
نِعْمَ لْمَصِيرْ ..
هَكْدَا كَانْ؛
سْبَابْ هْبُوطْنَا:
أَمْر اللهْ .. الغَفّارْ!
مِيعَادْ رْجُوعْنَا:
عِلْمَ اللهْ .. الجَبَّارْ!
أَنَا لْمَسْتُورْ:
عَبْد .. السَّتَّارْ،
كَ نْوَعّي .. لْكِيْدَارْ،
نْرُدُّو .. طُوكَارْ!
حيَّ عَ تّحْريرْ ..
كَ نَتْأَمّلْ؛
فِينْ نْقَارْضُو .. لَبْرَارْ؟
غَ نْدَرْدَكْ؛
عَلْ .. لَشْرَارْ!
اللهْ مُولْ تِّيسِيرْ ..
سَاعَاتْ .. لَبْلَا،
كْتِيرَا .. زَحْلَة،
وَ سْوِيعَة:
فَايْضَة بْ لَخْميرْ ..
غَوَّتْ لْمُولُودْ،
لْݣا ݣُدَّامُو .. رِحْلَة.
تْزَادْ غَ مَزْيودْ،
عَاقْ بَ .. لْحَصْلَة.
طَلْعَاتْ مْعَاهْ؛
بَالْ عْلَ مُّو وَ بَّاهْ!
عْطَاهَا لَ تْكَرْكِيرْ ..
أَنَا مَجْدُونْ؛
ضَرَّابْ .. لْمَتْلَة،
كَاسْ لَهْوَى؛
بْدا .. كَ يَحْلَا،
وَلْوَقْت كَ يْطيرْ ..
رُوحِي وَاعْيَة،
بْ هَادْ .. لْوَحْلَة.
نَفْسِي سَاخْطَة؛
خَطْرَا بَ عْقَلْهَا،
لْ مَ بَاقي .. هَبْلَة.
مَسْحَاتْ سْمَا،
بْ لِيݣَا .. كَحْلَة.
حيتْ جَحُودَة؛
بْغَاتْ تَّخْيِيرْ ..
حِيتْ جَهُولَة؛
بْغَاتْ تَّقْرِيرْ ..
بقلم عبد المجيد موميروس
شاعر زجّال وكاتب الرأي