اش هاذ الشي للي جرا ليك او طرا ؟!
فين سوق الكلب فين ذيك الصاكة الصفرا ؟
مابقا والو…غير الريح او لخلا او الغبرة !!!
رحلو هم هجروهم لمكان واشوفو على حكرة !!
كنخاف عل القيسارية حتاهي تجيها النوبة فالهجرة !!
فين ذيك الكورة الواعرة ديال ملعب الحفرة ؟!
البيض او خاوية فعامرة او مراوغات او تواشي اخرى !!!
اجي نوريكم فين طاحت ليا لخبزة واحد المرة !!!
يالله عجناتها لواليدة ..فطيرة ماخامرة !!!
اوخافت عليا مسكينة جارتنا اممي زهرة !!!
نقاتها او عوداتها… ماعرفات لوليدة اش جرى !!!
كنا ناضين في لقراية فالكورة فالطرونبية فالسخرة !!
ماشي دابا اجيب ليك كاس الما ويعمرالدنيا قطرة !!
مايتسخر ليك غير بالرغيب اوالتحزار اوشلا هضرة !!
في لحلاقي ضحكنا مزيان اوبسطنا او سمعنا الوثرة !!
غير بالعباسية لعزيزة لا ريال لا جوج لا عشرة !!
اوقليل فينا لي عندو هاذ النحاسية هاذ العشرة !!!
تكون عندي فالعيد نمشي عند لعميمة زينة البشرة !!
اونضبر على فلوس السعادة اولا شريف فديك الفترة
كنت نمشي للقيسارية باش تعيط عليا شي امرة !!!
تقايس عليا شي تريكو او لا قميجة ..ماعارفة نمرة !!!
ياريت كون كان بالامكان ندير لكل كسوة صورة !!!
كون بررعتكم اخوتي تصاور… خطرا خطرا
شحال من مرة تغدينا بمرقة بلا لحم غير الخضرة !!
ناشطين مع صحابنا ..السعادة ماكتباع ماكتشرى !!
اش طرا لك يا زين الاحياء يا سنطرا ؟!
ناس طيبين مصوابين تحلا معاهم العشرة !
تفرقات اللمة اواتقاضات العشرة ياحسرة اوياحسرة !
ياريت ايديرو فمكانهم نصب عالي للعرفان والذكرى !!
عاطف إبراهيم
