د. مراد علمي
أستاذ جامعي، كاتب ومترجم
الإسلام الـفـردي، مرحبا أو آلف مرحبا بيه، ولاكن الإسلام السياسي ديال جماعة “الإخوان المسلمين” أو اللي ملقـّم عليهم مرفوض، “حتى يرث الله الأرض”، لأنه فى العمق فاشي، ديكتاتوري، شمولي، بحال فاشية هيتلار، موسوليني، البنا، السيد قطب، بن لادن، الدّواعـْـشى أو زرّيعـتــهم، هاد النوع من الإسلام ما كايعرف غير معايا ولا ّ ضدّي، يعني غير إمـّـا عـدو ولا ّ صديق، الإسلام السياسي، اللي عنصري فى العمق، كايفرّق الناس ألــْـجوج فئات: المسلم أو الكافـر، أو الكافر ما إكون غير عدو، هاكدا كايخلق الإسلام السياسي حقد، كراهية مستدامة بين مخلوقات الله، كايشكل خطر محدق ضد الإنسانية أو كايهدّد السلام العالمي.
أو الإخوان المسلمين المغاربة كايفكروا بنفس الطريقة، نعيقهم، تزباطهم فى البرلمان المغربي أحسن دليل، والله ما عمـّـرني نتيق بالأحزاب المغربية اللي كولـّها فضايح أوكاتبيع عرضها بكرسي ولا ّ جوج، بحال حزب التقدم أو الإشتراكية “الوهمية”، أمـّا الإخوان اللي هادي كثر من 30 عام أو هوما كايحلموا بدولة إسلامية “هايْ كلاص” ما غاديش إيجيوْا أو يتخـلاّوْا على هاد الحلم العدب اللي سمّم ليهم الدّات بعسولاتو، بخرافاتـو أو بالحوريات اللي ما لقاوْا ما إديروا أو غير كايتسنــّـاوهم، أو يعياوْا ما إفرعوا لينا راسنا بكذوبهم، بخدعهم! حنا كانشوفوا، كانصـدّقـوا الأعمال أو ما كاندّيوْهاش فى الأقوال، ماشي بغى شحال هادي يفرض علينا هاداك سنان لحليب فى تدبير الشأن العام، مصطفى الخلفي، غير العربية أو الأمازيغية فى التليفيزيون باش نتكـلــّـخوا “عن كاملنا”؟ الأمازيغية مرحبا بيها أو هادي لوغتنا أو لوغة صحابنا، حبابنا، جدودنا، أمـّـا العربية، اللي هي فى الأصل خليط من لهجات، دارجات شرقـية، لا من سوميرية، نبطية، عاشورية، آرامية إلخ، شنو غادي نعملوا بهاد المنتوج الفاسد؟
أوهادوا كايستعملوا أو إدافعوا على العربية غير باش ما نتقدّموش، نزيدوا اللقدّام أو ما إيحاسبهمش الشعب نهار آخور، ليومينا هادا باقي ما جاوبوناش هاد خيـّـاتنا على هاد السؤال البسيط، علاش كايصيفطوا أولادهم لفرانسا ولا ّ ميريكان، اللي كايكرهوا إيلا جينا نشوفوا، باش يقراوْا بلغة أجنبية أو هوما كايدافعوا على لغة هادي كثر من 50 عام أو هي فى وضعية “لا تحسد عليها”؟ بغاوْا يعتارفوا ولا ّ لا اللغة العربية لغة متجاوزة اليوما أو ما كاينش اللي كايدّيها فيها، غير هادوك اللي كايستغلــّـوها قصد تركـيع أو تجويع الشعب، أو اللي بغى إتـــّـبوهل علينا كايقول لينا: “هادا كلام الله”، بحال إيلا كايعرفوا الله، لوغتو أو ساكن معاهم فى الحومة، هادا هو الكفر بالله أو الملة، الله صافط القرآن لناس كولهم، أو إهضروا، إكتبوا حتى بالإيسبيرانطو، أو نتا مالك؟
الإسلام السياسي مرتابط بالفكرة أنه هو الحل لــَـصداع العالم “بأسره”، أو فى أول الأمر كايحارب الدولة، بالأخص حكام الدول الإسلامية، ولا ّ كايـلـْحس ليهم اليوما الكابـّـة باش إتـــّـقلب عليهم غدّا، يعني كايتمسكن حتى يتمكــّن، باش إقـدّ إدوز من بعد ألـــّـعالم كولــّـو أو إردّوا صحة “عالم إسلامي”، صافي بحال “الحليب الـكحـل”، ما فيه ديانات اخرى، الإسلام أو بسّ! أو اللي ما بغاش؟ العافية أو الباروض، أو هاكدا كان كايخمم السيد قطب حتى شنقو جمال عبدالناصر، أمـّا مرسي، هاد خيـيــّـنا اللي تآمر على أولاد بلادو، خانهـم، ها هو اليوما فى الحبس أو كايدوق مرارة المؤبد.
عياوْا ما إدافعوا عليه “إخوانو” فى المغـرب، ولاكن “بدون جدوى”، زايدون باقي ما نسيناش كيفاش دافعوا “الإخوان المغاربة” بشراسة على الصحفي أحمد منصور أو زوّجوه بمغربية من عندهم، أو شكون كان شاهد على هاد “المسرحية ديال جوج فرانك”؟ قيادي كبير ديالهم باقيين يدّيه كايقطروا بدم الأبرياء، آيْ هاي اليوما، بالكوستيم، الطموبيل أو ما كاين غير آرى برّع، الأوتيلات المصنفة “ووجبات الطعام المنمقة”، بالطبع من مال الشعب المغربي.
سياسة الإسلام السياسي هي من حـبّـة ردّها قـبـّـة، يعني حبوب أو زبود، طلق رجليك، تسرّح ليـّـا معا راسك مزيان أو وظـّـف أكبر عدد من عشيرتك حتى تعـتـر، تلقى صحاب اللحي كثر من اللي مكــرّطينها! ردّ كولـّـشي بالمقلوب، إيلا كونتي البارح كاتنتامي ألأقلية خارجة على الأمة أو كاتغـنـّي “خارج السرب”، بحال الخوارج، “زنادقة وغلاة البارحة”، باللغة المغربية كانسمـّـيوْهم “رباعة البــّـانضية”، قلب الشــّـواري أو ردّهم هوما اللي غالطين أو ما ماشيينش فى طريق الله، بحال إيلا السـّوارت ديال الدنيا أو الآخرة بين يديك، لا، أبدًا! فاين أمـّـا مات شي واحد فى العالم على يدّ إسلامي، عرف أن الإسلام السياسي ماشي بعيد أو هو اللي مأطــّـرو، مخدّرو، غير هاد العام تسبب الإسلام السياسي فى كثر من 15 هجمات إرهابية أو فى قتيلة كثر من 290 شخص فى تركيا بوحدها، تعزية قلبية من هاد المنبر لجميع عائلات الضحايا اللي غصب ليهم الإسلام السياسي فرد من عائلتهم، الصــّـبر مـرّ، ولاكن فيه الشــّـفى.
شحال هادي كان العالم الإسلامي كاينتج العلماء، المفكرين، العقلاء، الأطباء، الفلاسفة، العباقرة، أمـّـا اليوما، مع الأسف، ما كايصنع والو، غير كايفرّخ فى الهيجان، الحماق، الفتنة، التطرف أو الأورام السرطانية الخبيثة، الحالة الصحية ديال الدول الإسلامية مستـعصية لأنه كلاها الكونـْـصير من الداخل حتى قتل في روحها كولّ نوع من الإبداع، الإختراع أو الإزدهار الفكري، أو ما كاين غير اللي مركـّـع ولا ّ باسط نفوذو على لاخور، الراجل على المرا، الشاب على الكبير أو الإسلام السياسي، المتخلف مركــّـعهم كولـّهم.
الإسلام السياسي كايستغل شخصية المسلمين المهزوزة غير باش إردّ من هاد الشعور بعدم الرضى على النفس ولا ّ بمركب نقص مزمن ضد تفوق الغرب قوة، اللي فى الحقيقة غير وهم أو نوع من التبرير ألـهمجية الإسلام السياسي اللي كايستعمل العنف، لا اللفظي ولا ّ الدّاتي، ولا ّ عل الأقل كايحرّض عليه، “يعني أضعف الإيمان”.
المرض، الشلل اللي تسلــّـط على الدّات أو لـَــعضام كايرفض كولّ نوع من المصالحة حتى رجعات إيتيمة، ربّ هاد القوم اللي ما عمـّرو إكون ربـّـنا، “الرحمان الرحيم”، ما كايعرف غير “سكوت ولا ّ نصرّف ليك سنانك فى فـمـّـك!” أو غير كاتحفى ألإسلام السياسي أو ما كايعرف ما إدير كايلـصــّـق مشاكيلو، كــُـبتو، محنتو، تخلــّـفو ألميركان أو الغـرب، بالطبع كاينين شي تويشيات خصـّـنا نهضروا عليهم شي نهار، فى عوط ما إشوف راسو فى المرايا أو شحال نياب الوقت نالت مـنــّـو، من كيــّـانـو، كالس كايصنع فى الفقاعات الكلامية، البلبلة، فى عوط ما إشوف كيفاش نمشيوْا ألــّـمرّيخ، كايضيـيـّـع وقتو، جهدو حتى يلقى الحل كيفاش يقتل جارو، يعني بعبارات اخرى فى عوط العلم، الجهل، العنف أو الهمجية.
الديمقراطية ما كاتــّـبنـاش بالتسابح فى اليد، بالمظاهر، لا! بالمعقول، الجدية، الإخلاص، الإنسانية، العدالة الإجتماعية، أمـّـا الكذوب، غير باش تفوز أو تقدي حاجتك، ما عندو ما إدير، تكذب عليا، اليوما، غدّا، أو حتى لاين؟ تحصل، تحصل، لأن الكـدّاب رجليه صغار، قصار، على أمــّـو ما غار، باعها فى الـدّلالة بجوج فرانك، مقـصـّـح وجهو، طنـك.
