شحال صعيب العيشه هاد الأيام فالبلاد و تنت النهار و ماطال تتعيش أجواء الإنتخابات ، ما عرفتش الشباب واش تتحسو بنفس الإحساس اللي صبح معدٌبني ، إيه أسيدي معدًبيني الكفره بالله هاد الناس الشرفاء، فين ما وليتي ، فين ماصديتي محاصريني حنا ضد الفساد ، حنا المعقول ، حنا صوت الشعب ، تتهرب من هاد الزنقه ، تيخرجو من ديك الزنقه ، تتسد عليهم الباب ، تيدخلو من الشرجم ، تتسد الشرجم ، كيخرجو من التلفزه ، كلشي ضد الفساد ، كلشي ضد المحسوبيه ، تيجيب راسي فحال لحنا فحمله انتخابيه بالسويد ولا بريطانيا العظمى ، هاد الشرفاء باغين لينا الخير و حنا تنتهربو عليهم ، هدا كل من باب الدعابه و لكن علاش مانكونوش صرحاء شوية مع ريوسنا و بركه من الشيزوفرينيا دابا حنا متفقين ، ان هاد جماعة المنافقين و قدماء أحزاب الشياطين هما اللي معطلين عجلة الإصلاح و التغيير و الخير لهاد البلاد ، أسيدي ٱسلمنا و آمنا بهاد الفكره و لكن جاوبوني على واحد السؤال ، ياك حنا عامة الشعب اللي باغي الصلاح لهاد البلاد ، واش كل واحد فينا كمواطن مسؤول فهاد البلاد حارب الفساد فحياتو اليومية وسمحو لي نجاوبكوم كيفاش ؟؟؟؟ تصورو معايا حنا عامة الشعب ، لو كل واحد فينا حارب الفساد فخدمتو و دار خدمتو كما يجب بضمير و مسؤوليه و خاف من الله قبل ما يخاف من الباطرون و مول الشكاره ما نقدرش تصوّر بلاد تحارب الفساد من الفوق و ثقافة الفساد عروق متجدره فينا من الداخل ؛ محاربة الفساد هي تربية و سلوك تيبدا من الدشاير البعيدة و الديور الصغيره قبل ما يوصل الڨيلات الكبيره ، ظاهرة الغش والاّ مسؤوليه ولاٌت عندنا ماركه مسجلة مظاهر الفساد و الغش باينه فتربيتنا لولادنا بتلقينهم قناعات خاويه منها : “المصلحه أوّلا ، مول الشكّاره هو اللي يحْكم ، الفلوس خاصها تحْضر ، المظاهر هي اللي تحْكم ، نافق و سايس حتى تقضي مصلحتك” حتى المدرسه وصلها الإهمال بدروس باليه و حامضه ، ولاّت عندنا قناعه فالمجتمع ماشي مهم الطالب يغش ، المهم هو ينجح الغش و الفساد مرض نتلذد به في هذا الوطن ، الغش في مشاعرنا ، الغش في الطرقات ، الغش في البيع و الشرا ؛ الغش فالسبيطارات ، الغش فكلشي بدون استثناء تصورو معايا واحد اللوحة نرسموها جْميع ، جماعه حضرية تيسكنها 100 الف نسمه ، و رئيسها فاسد و لا يؤمن بالإصلاح و حنا ساكنة هاد الجماعة المضلومين الشرفاء الأخيار ، نريد الصلاح لهاد الجماعه لو آفترضنا 200 شخص من هاد الساكنه قرْرو يْديرو پكنيك قدّام الجماعة صبحية سبت أو يشربو قهيوة بدون شعارات ، بدون هتافات ، بكامل السلميه و التحضر و يرسلو إرسالية صغيرة لرئيس الجماعة يطالبوه بالإصلاح واش هاد الواقع الجماعي ماغديش يتغيٌر . أكيد كلشي غادي يتغير لسبب بسيط ، الإصلاح و المسؤولية و خدمة البلاد سلوك معدي إلا كانت التربه صالحة و طاهره و النّيه خالصه بركة من الشيزوفرينيا و نظريّة المؤامرة و لعب دور الضحية ، قبل ما تغيّر بلادك ، غيّر عقليتك ، غيّر سلوكك
