بقلم عبد المجيد مومر (موميروس)
قْبَلْ مَا نَبْدَاوْ؛
إِيلَا تْشَابْهَات لِيكُمْ هَادْ لْحَجَّايَة، مْعَا لْوَاقِيعْ. راهْ غِيرْ صُدْفَة!.
سُبْحَان اللهْ لْمُقِيتْ، لْبَارِي لْمُحْيِي لْمُمِيتْ. هَا عَيْنِي مِيزَانِي، عَيَّاتْ عَدْيَانِي. حِيتَانَا لْمُوغْرَابِي، شَتَّاتْ تَّشْتِيتْ. هَا لْوَزْنَة هَا لْمُوزُونْ، لْبَارُونْ بِينْ لَمْدُونْ. كَا نَتْخَلْوَى فْكَامْبِّينْغ سَعِيدْ، لَكِينْ خْيَالِي فْوُولْ سَتْرِيتْ. حِيتْ سَاهْلَة، عَنْدِي بَلْخَفْ. هَانَا دَغْيَا، كَا نَتْسَيَّفْ. هَا بْخُورِي: بَلُّورْ لَغْرَانِيتْ!.
يَانَا يَانَا، كْرُوسِّيسَتْ لَحْرُوفْ. سَالَمْ غَانَمْ، سّانْ إِيصُوفْ. تَا نَضْحَكْ، عْلَى كَاعْ لْكَتَاكِيتْ. مِلِّي كَالَاوْ بَلْكَالَة، قَالُو مُومِيرُوسْ صَافِي سَالَا، وَانَا عَادْ دِيمَاريتْ!.
يَانَا لْبَارُونْ؛ شَدِّيتْ لْعَرْبُونْ، غَا نْجَدَّدْ كَاعْ لَمْتُونْ. كا نَبْغِيكْ أَ سُومَة؛ يَا رِيتْ يَا رِيتْ، تْغَنِّي لِيَّا يَا رِيتْ. سُومَة صْبِيعَاتْ لَغْزَالْ، سُومَة مُولَاتْ لْجَمَالْ، سُومَة بُومْبَا دِينَامِيتْ. وَاهْيَا لْمَحْبُوبَة، زِينَكْ مَزِّينُو. رَّشْمَة لْمَكْتُوبَة، بَزْوَاقْ لْبِينُو. ها نْسِيبَةْ بُوطْحَيْشَة، بَخْرَاتُو مَنْ عِينُو. عَادْ؛ تَقْفَاتُو بَلْكَبْرِيتْ.
وَاوْ وَّاوْ؛ قْدِيمَة هَاوْ، هَادْ لِيسَطْوَارْ. وَ حَّاوْ؛ لْحُوصَلَا بْغَاوْ، يْقَتْلُو لِيسَبْوارْ. لَكِينْ أنَا، وَ اللهْ مَا رْضِيتْ. يَاوْ عْلِيهَا، أنا كَاعْمَا نْسِيتْ.
وَانَا نْسَوَّل؛ حَوْلَة بنْت لْغُولْ، أَ مَايْ تْرِيتْ؟. كِيفَاشْ بُوكْ لْبَسِيطْ، وَلَّى نَّشِيطْ؟. تِّيوْ؛ شْحالْ تَّرْوَة، أَ بَنْت لْعَبِيطْ؟. زِيدْ أَ عَاوْعَاوْ، بَانْلِي نْتَا عَادْ سْحِيتْ؟. وَا دِيلْ كُولِيخَا؛ قَالُو لْمَلْيَارْ، هَاكَّا فُوقْ لْمَلْيَارْ. لكين لْغُولْ بُوطْحَيْشَة، مَا قَالْشِي عْيِيتْ.
كِيسْ؛ وْ كِيسْ وْ كِيسْ. إِيدَّكْ فَلْمِينُوطْ، أَ دِّيسْ لْبَئِيسْ. حْفَاتْ لِيكْ نَّقْشَة، خْوِيتِي لَاكِيسْ. هَانْتَا فْلَقْوِيدِيسْ، غَا تْشَدْ لَانْتْرِيتْ. أَيْوَا؛ لْحَبْس دَاخْ أُوْلَا؟!، هَا دِّيسْ لْمَخْمُوجْ، بَطَّجِينْ وَ رُّوجْ، مُحَالْ يَسْتُوعَى بَكْرِي. حْبِيبُو لَبْزَخْ، سْبَقْنِي لْبَرْزَخْ، ضَايَعْ كَا يْبَرِي. وَرِّيوَهْ؛ ها حُلْمِي، يَاكْ مَنْ حْلِيبْ مِّي، سْقَاتُو: لِي فْصُغْرِي. نُوضِي أَ بَايْبِي، مَا بَعتْ مَا تَّشْرِيتْ!.
وَا هَايْنَة لَفْرِيدَة، وَا لَمْبَعْكَّة لَمْشَعْكَّة؛ نُوضي دْعِينِي. لَّاغِيسْ؛ جِيبِي لْبُولِيسْ، مَنْ مُخَّكْ خَرْجِينِي. وَاهْ؛ بْلَا مَا تَّبْعِينِي، مَا فِيّاشْ تْفَنْتِيتْ. حَاشَاكُمْ؛ رِّيعْ وْ لَفْرِيعْ، لْغُولْ وْ لَخْلِيعْ، فْمَرْمِيطَةْ زِّيتْ. حِيتَانَا؛ غَا نَجْمَعْهُمْ بْجُوجْ، مْكَتْفِينْ فَلْكَرُّوجْ. هَا صْكُورْ مْعَا رُّوكُورْ، عْلَمَادَا بَاطِيتْ. عَارْ جَّارْ عَلْ جَّارْ، ها حْبِيبُو لْغَدَّارْ، ها لُوزِيعَة قُنْطَارْ، يَاسْ بْلَا تَصْوِيتْ.
يَاكْ أَنَا حَالَفْ؛ بْرَبِّي لَا فْرَاتْ، فِيكُمْ لَا بْقاتْ. شَارْجِي كُلْشِي جَمْلَة، ها حَقِّي خْدِيتْ. يَاوْ يَاوْ: يَلْعَنْ شَرْكُمْ. أَهَا وَّاوْ: جْمَعُو ضَرْكُمْ. وَاهْيَا لْحُتَالَة؛ نْهَارْ دَرْت بَجْنَابِي، حْتَا حَدْ مَا لْقِيتْ.
ها شْعَيْبِيَة، بْلَا قُوَّاتْ. حيت لَيَّامْ بِيهَا تَّلَّاتْ، وْ لَعْشِيَّة رَ تْعَاشَاتْ، مَكَاينْ غِيرْ سْلِيتْ. هَايْنَة لَفْرِيدة مْعَ سَالِي، تْعَالِي وَا تْعَالِي. شُوفِي شِيفَرْ دَافِّيرْ، دَارْ بَارَاشِيتْ. غَا: نْجِيبُو دَّوْرَة، تْلَاتْ مْيَاوْ سْتِينْ. قَلْبِي وَ تْشَقْ..لْبِي، أَ مُولات لُوكْسِجِينْ. غَا: نَبْدَاوْ لْوِيكَانَدْ، مَنْ نْهَارْ لَتْنِينْ. يَاوْ؛ مَنْتَمْ نِيشَانْ، نْخُرْجُو فَسْبِيتْ.
لْغَلَّة أَ بَعْبُولَة، عنْد مُولْ سْطُولَا. ضَرْبِيهَا بْخَبْشَة، لْمُوغْرَابِي: ولد شَّعب عْفِيرِيتْ. حيتْ زَاوْيَة لَفْشُوشْ، دَرْجَة بْلَا بِيرْكَارْ. تَّاوْ دِيرْلُو لِيكُوشْ، وِيتَكْ عْلَى بِزَارْ. يَاعْلَا؛ وَ مْعَا مَنْ تَّلِّيتْ؟!.
يَاكْ؛ ضْصَرْ رَّعْوَانِي، حِيتْ جَاتُو لْفُرْصَة. رَّبْ لْعَالِي قَوَّانِي، كُورْصَة حْتَا لْبُورْصَة. وَ اللهْ مَا تْفَاكِّيتْ. سِيحَتْ سِيرْتُو، قْلَبْ صْدَافْ لْفِيسْتَة. لْغُولْ لْقَا سْمِيتُو، مَا كَايْنَاشِ فَلِّيسْتَة، نَاضْ لْبَسْ جَّاكِيتْ. وَا لْغُولْ لْخَانَعْ، بُوطْحَيْشَة وَاتَّا رْصَا. هَا لْمُوغْرَابي رَا طَّالَعْ، كِي نْمَرْ فَلْعَرْصَة. نَقْرَصْ مَلْ قُرْصَة، تَلْطَاشْ لْقَرْصَة. أَ جْقَلَّةْ كُولِيخَا، شَاطْ عَا تْفَرْتِيتْ.
هَايْ هَايْ؛ إيوَا شُوفْ، علَى دَنَاَءَة. نُقْطَة وْ جُرْ سْطَرْ، قَالِّيكْ: لَمْهَاوِينْ كَفَاَءَة؟!. يَاكْ غَا لْحُوصَلَا، شَفْرُو بَابْ لْبِيتْ. أَفَطَارْ لْخَطَارْ، سَمْعُو يَا حُضَّارْ. أَنَا لْبَارُونْ وَاهْيَا لَنْعَامْ، كَاعْمَا فْهَادْ لْعُولَامْ، مَزَالْ مَا مَلِّيتْ. غَا: نْعَاوَدْ مَلَّوَلْ، كَنِّي عَادْ وَلِّيتْ. عَارْ طْرِيقْ لْعَارْ؛ زَفَّتْهَا لْمَقْطُوعْ، رَيَّبْ لْمَشْرُوعْ. شَمْ أَ بُوطْحَيْشَة؛ شِّي لِّي شَمِّيتْ.
وَا تْقُولْ شِي حَرْف: خْنَازْ؛ ها سْقِيطَةْ دْيَالْ لَمْعَانِي، خَلِّيتْ سَلْسُولْهَا مَجْمُوعْ. فْصَلْت رَاسْهَا، شْوِيتْ فَّادْ لْمَوْضُوعْ. وَانَا لْمُوغْرَابِي؛ نَسْلَخْ وَ نْسَرَّحْ، نْشَرَّحْ وَ نْمَلَّحْ. نْقَدَّدْ نْكَرْدَسْ، بْلا دْغَانِيشْ لْمَمْنُوعْ. نَسْلَقْ كَرْعِينْ نَّمْ، يَاوْ نْبَخَّرْ مُخُّو لْمَفْرُوعْ. أَوْ يَاوِي أَوْ يَاوِي، غَا دِيرُو لِي كِيتْ.
كَحْلَة زَحْلَة، دَارَتْهَا حَوْلَة، بَنْت لْغُولْ أَ لْكَلَاخْ. مْشَهْيَة لَمْبَرْغِينِي، زِيدْهَا مَايبَاخْ. دَهْبِيَّة دَهْبِيَّة، شُو بُوهَا كِي دَاخْ. فَاشْ لَاقَا لَحْرُوفْ، لْقَانِي لْفَرْشَاخْ. حِيتَانَا: لْمُوغْرَابِي يَانَا، نْشَلَّخْهَا تَشْلَاخْ. حيتْ رَاسِي وَ رْوَيْسِي، قْصَحْ مَنْ لَغْرَافِيتْ.
حَوْلَة بنت لْغُولْ؛ تِّيوْ كُحْزِي لْهِيهْ، رَ لْعَيْطَة فْزْنَيْقَة. هَانَا: بِيهْ فِيهْ، نْشَدَّكْ فْلَبْنَيْقَة. هَاكِي خُودِي مَا تَعْطِيهْ، ها زَّرْقَة لَوْرَيْقَة. هَاكَّاكْ؛ خَلِّينِي مِنِّي لِيهْ، وَ سَّوْطَة لَحْمَيْقَة. كَا تْقَرْدَنْ لَقْمَيْمِيرْ، غَزَّاتْ فِيهْ نِّيتْ. هَاوَّا هَاوَّا، رْهَنْ لَحْوِينِيتْ.
ها مَسْكَة فْلِيُّو، ها لْبُوطَا بْلَا تِيُّو، ها كُوكِيزْ بِيسْكوِيتْ. مُوتَا وْ وَرَتَة؛ جَا خُوهْ وَ خْيُّو، مْعَا بَّاهْ وَ بَيُّو. يَاخْ: تَرِّيكَةْ لْخَرْتِيتْ. قْرَيْعَة دْيَالْ لَعْطَرْ، رُولُو وْ جُرْ سْطَرْ، كَاغِيطْ طْوَالِيتْ.
حَرْتُوكَة لَمْحنْسَرْ، أَ دَاكْ جْلَاخَة. شَمْ أَ لَفْسَرْ، لْمِيكَة نَفَّاخَة. بَانْ لِيكْ سَّرْ، لَمْعَانِي دَوَّاخَة. غَادِي وْ كَا تَخْسَرْ، حِيتْ لْوَقْت رَضَّاخَة. رُولْ مَا عَنْدِي بَاكَاجْ، عَاوَدْ: قَادْ تَّوْقِيتْ.
عبد المجيد مومر (موميروس)
رئيس اللجنة التحضيرية لحزب الإختيار و الإنتصار
Abdulmajid Moumĕrõs
Abdulmajid Moumĕrõs
