د. مراد علمي
أستاذ جامعي، كاتب ومترجم
مـناين كـتجي هاد الرغبة؟ اللي كـتـدفعـنا نـبــعــّـدوا على حبابنا، على أصدقائنا أو بلادنا، أو شنو هو الحافز الأساسي؟ أكيد حب الإستطلاع فى أول الأمر، من بعد كتجي حب المعرفة كيف كيقول المثل المغربي الحكيم: اللي جال أو شاف، حسن من اللي عاش بزاف، جميع البحوث كـتــثبت أن السفر مرتابط بجينات الإنسان اللي هادي مئات الآلاف من السنين أو هو شغوف بالترحال أو التجوال.
ليومنا هادا يمكن لينا نعتابروا السفر كـاختبار، عملية نضج كتخدم صنع الإنسان المنفتح على محيطو أو على العالم، أو السفر بصفة عامة مرتابط ديما بالأمل أو كسر الـرّوتين القاتل. عن طريق السفر كنكتاشفوا الذات، الأعطاب اللي ضروري نصحـحوا، ملئ الثغرات المعرفية، الإجتماعية أو الكونية، ما عـمــّـرك تلقى مشكلة مع اللي كيعرف ولا ّ جال، اللي ما كـيعرفش ولا ّ ما عمـّـرو خروج على حدود المغرب، غادي تلقى بالفعل معاه صعوبة فى التفاهم، لأن جميع الأسفار ما هي غير رحلة ألـْـدواخل الذات، نوع من البحث على الهوية، اللي بغى يكتاشف الذات، خـصــّـو إسافر، عن طريق السفر كنخلقوا مسافة معينة، لا بيناتنا ولا بينات المحيط اللي كونــّـا متعوّدين عليه، هاكدا كـنـكتـاشفوا شنو بغينا أو شكون هوما حنا.
شكون اللي ما كيتذكــّـرش السفر اللول ديالو، بلا والدين ولا أفراد من العائلة، يمكن لينا نربطوا السفر بتقييم جديد ألــّـحياة أو نظرتنا ألــّـعالم، لأن فى العمق غير كنسافروا ما باغيينش نكتاشفوا مناظر جديدة، ولاكن نـشـوفوا بعض الأمور بـعنين جـداد، السفر هو اللي كـيحمينا من الأفكار المسبقة، العقل الضيق أو التقوقع.
حلاوة السفر كـتـكمن فى حالة التوتر الإيجابي، حالة الطوارئ اللي كنعيشوا طيلة هاد المدة، المعهود كينسحب باش يتعوّض بالمجهول، أو اليقين كتطغى عليه الشبهة، السفر نوع من القطيعة الشيقة اللي كنخلقوا باش نكتاشفوا الجديد، العميق، كـندركوا أن السفر غادي يتسالا، غادي يتسالا، قـبل ما يبدا الـجديد.
من المحتمل أتـــّـهـز الهوية ديالنا إيلا صتادمات بالغريب، لأنه كـنـتـعـرّضوا بلا أي حماية ألـْـجبروت أو طقوس الآخر، فى هاد الحالة جميع القيم، المعتقدات أو الذات بنفسها كـتـعاني من الشك أو الريبة، هاد الشي كولــّـو كيـشـكــّـل فرصة جديدة باش نتعـرّفوا حسن على نفوسنا، لأنه إيلا بتاعدنا على ذاتنا اللي كنكونوا متخبـّـطين فيها، عاد كيمكن لينا نـكتـاشفوها من جديد، نـتـخـلــّصوا بطريقة لبيقة، مرينة من مواقف متجاوزة ولا ّ من أفكار ولت، لأنه ساهل تفهم أفكار جديدة، ولا أتــّـخـلا ّ على أفكار قديمة، أو فى هاد الحالة كيرجع السفر، سـفـر من الذات اللي كـتـقــبــّـل بأريحية كبيرة جميع التغييرات، المستجدات، المقاربات، مفتوحة على جوج ديال الجهات، على البدو أو النهاية، باختصار نفاذة.
ولاكن ضروري نتكلموا على المشاكل اللي يمكن ليها تنتج من السفر، مثلا، ما كنفهموش الناس مياة فى المياة ولا ّ يلا ّه 50 فى المياة، كنتلفوا فى الطريق، فى المدينة، ما كنعرفوش كيفاش نتفاعلوا بطريقة إيجابية مع الحضارة، الثقافة اللي كنعيشوا دابا، جميع هاد الأخطار أو المخاوف كتدفعنا نكونوا حذرين، هاكدا كيمكن لينا نشحذوا، نقويوْا حواسـّـنا باش نتوفروا على نظرة شمولية قصد درك المخاطر، أو اللي كيزيد الطين بلة هي أننا ما متعـوّدينش نصـفــّـيوْا جميع هاد التجارب، الأحاسيس اللي كتهيج الذات، لذلك كنضطرّوا نكونوا ديما على حذر أو نتــّـاسموا بمرونة كبيرة، نظرا ألــّـكم الهائل من الأشياء الجديدة اللي غزات الذات، لذلك كنشعروا بعمق فى الحياة، بأحاسيس قوية، بمتعة الحياة، لأن الحياة تجديد مستمر.
السفـر، “من استطاع إليه سبيلا”، هو مخدر “حلال” الألفية الثالثة، أو اللي قـنط، ما قـدّش على الغـُـربة، عليه بالسـّـاتيليت، السـّـمارت فون فى الجيب ولا ّ البيسـّي بورطابل، هاكدا غادي تكون الذات فى الخارج أو الـتـــّـخميمة فى باب المقام، صفـرو.
