بغيت نغمض و نفتح عيني و نشوف بلادي زاهية حتى هي ، الطرقان مزفتة ، السبيطارات باهية، الناس شبعانة وآلصبيان فرحانة ، الشوماج ميت و الضمير في بلادي حي ،.ماكاين لا فساد ، لا رشوة ، لا بّاك صحبي لا ماماك خالتي و لا شعارات خاوية ، كرهت أخويا نسمع ” هاكْ و را ، كول و كّل ، دهن السير يسير ، قهوتي بردات خاصك تخلّص علي قهوة ” سولت جدّة للاّ مولات الفهامة ، علاش حنا ديما هاكّا؟؟؟ ياكما جدة ، حنا فشي ليلة جاو و بدلونا ؟؟ سمعت فحجايتك و أنا صغير :” بلادي بلاد النخوة و الخير ، مّاليها ناس شبعانة ، تعرف الله ، تعرف الحق ، الجار يسوّل على جارو ، و الصاحب عندكم صاحب صاحبو، القلوب مصفية ، لا جوع ، لا تكبّر ، ديورنا مفتوحة و داري و دارك وحدة آش هادشي يا جدة يا للّا يا مولات الفهامة يا كما جاو فشي ليلة كحلة و بدلونا و لّا انتي شادّة فيّ و حجايتك خيوط من الكدوب مخبلة مرخيٌة؟؟؟ جاوباتني للّا مولات الفهامة : هذا زمان قصيف لهلا يردّو و آنتما مٌاليه أولدي نولدوهم و يخلعونا ، نكبّرو بهم و يصغرو بنا ، نتفكروهم و ينساونا ، نزرعوهم في بلا يصنا و يقلعونا ، دٌير الخير و ما تلقاه و كاين شي بعضين ولٌاو يْديرو الخير و يْتصورو مْعاه. مول الباطل فيكم يمشي وْسط الشارع هذا يْوسع ليه الطريق ، هذا يكبّر بيه ، و مول الحق راجل ضعيف ، مستور، محڭور يمشي جنب الحيط مسامر الفساد داڭة شوكْتها فْڭْدامو . شوية جدة للّا مولات الفهامة وْ هي تسولني : أجي ڭولٌي سْمعت صحابك ف الجكْسبوك ” بيناتْنا بغات تڭول زعما الفيسبوك” هدوك صحابك ولّاو تيْناضلو مع مّلات الصّايات و أنا نڭولّيها الحاجّه هديك سْميتها ” الحرية الفردية” و هي تضحك واحد الضحكة شاخده حتى بانو سنينات الحليب و ڭالْتلي” الحمد الله جابو الرجال الإستقلال قْبل منكم ، كون عوّلنا عْليكم المخيٌر فيكم عندو كونط فالفيسبوك و ڭلاكسي س 3 ، و إلا زهات عندو الدنيا تلقاه مشارجي البّورطابل و الكونكسيو حارّه” جْمعت جدّه للّا مولات الفهامه الوقفة وْ هي تڭو لي شْتّي غير مناضلي الجكسبوك ‘”الفيسبوك” الله يشويني فيكم.
خٌوتي نختمو على الطريقة الحمداوية اللي تتعجبني بزاف : عيّط الله ، تصيب الله ، إلا خْيابت دابا تْزيان”
بوحدك تضيع ، معا نستطيع ، غْدآ مغربنا يْزيان
بقلم : Simo Atir
