أحسن دليل هو تباكي “حزب التقدم والإشتراكية” على المنصب الوزاري اللي ضاع منـّـو فى الحكومة الحالية، بحال إيـلا ما كاين من بعد الإستوزار حتى شي حياة خـرى، هادا هو الداء المزمن ديال النخبة السياسية المغربية، عاد كايجيوْا، يبكيوْا، يشكيوْا علينا: “والله إيلا مظلومين”.
الفحش، الفساد بعينو هو لمــّـا كاتجي هاد الحكومة ولا ّ اللي سبقاتها أو تعيـيــّـن كثر من 30 أوزير بحال إيلا المغرب كايعوم فى شهريج من الماس أو الذهب، عاد كايدّاعيوْا بعض “صقور وبلابل” جل هاد الأحزاب أنهم جاوْا باش إصلحوا، إرشــّـدوا النفقات أو يقضيوْا على الزابونية أو الرشوة “عن آخرها”، ترضي أحزاب ميكروسكوبية ولا ّ كاتلعب على عامل العرق أو القبيلة، عقلية متخلفة بامتياز، بحقائب وزارية كبر منها ولا حتى على اللي مسؤولين على هاد الوزارات هادا حمق، تهور أو رشوة، بلا أي مناقشة، الدول العظمي يلا ّه عندها 16، 20 ولا ّ ڴاع 21 أوزير، لا ميريكان، النـڴليز، الصين، ألمانيا، اليابان إلخ.
أو حتى إيلا نصـّـبوا هاد الدول الوزراء عندهوم مناش، قادّين على تمويل حقائبهوم أو معاشاتهوم، أمـّـا حنا كاناخذوا للشعب باش نوكــّـلوا هاد الساسة اللي فى العمق مشغولين غير بمشاكيلهوم، بخصوماتهوم، بمصاليحهوم الشخصية، أمــّـا الشأن العام وارد غالبا غير فى الحملات الإنتخابية أو الخطابات الجوفاء، أكيد كاتخدم لجن البرلمان ولاكن بواحد السرعة اللي ما كاتـدل غير على الخمول أو الشعار: “لا زربة على صلاح”، ولو عالم اليوم محتاج للسرعة أو ما عندو ما إدير بالفنيانـين: شعار اليوما: “زرب تـربـح”، جميع الدول الأسياوية هاكدا نجحات، ماشي بالهضاضر الخاوية، أو قال ليـيــّـا، قولت ليه، شحال من المشاريع متعتــّـرة ليومينا هادا، لأن المسؤولين ما مسـوّقينش أو شعارهوم المحبوب هو مورايا أو الطوفان.
أخيرا ستقل أوزير البيئة الفرانساوي، حنا ما عمـّـرنا سمعنا شي أوزير ستقل، أكيد كاينة حالة ولا ّ جوج اللي يمكن لينا نعتابروهوم حالات ستثنائية فى تاريخ المغرب الحديث، أمــّـا فى غالب الأحيان عاهل البلاد هو اللي كايكون مضطر إسـرّحهوم، لأن الأنانية المفرطة أو حب الكورسي خـدّراتهوم، سـمــّـمات ليهوم الروح حتى باع البعض منهوم شرفو، عرضو أو روحو، بحال “فــاوْست”، هاد رئيس الحكومة بنفسو ماشي صافـطـو محمد السادس ألــْـدارو لمــّـا كان أوزير الخارجية، بلا حيا لا حشمة ها هو اليوما راجع من الباب الواسعة، هاد الراجل راجل طييب، لطيف، ما كاينفع ما كايضر ّ حـدّ، حسن ليه إڴـابل المرضى ديالو أو مرة مرة يـصدر فـتوى ولا ّ جوج.
السياسة قيم، أخلاق، إخلاص، وضوح الرؤية، التفاني فى خدمة الشأن العام أو مصالح المواطنات أو المواطنين بامتياز، السياسة أمانة، الناخب كايحط ّ بين يدّين السياسي، صاحب اليدين النظيفة، مستقبلو، أحلامو أو أحلام أولاد أولادو، غير إيلا خذينا كمثل التعليم، السياسي هو اللي كايرسم خارطة الطريق ألأجيال، إيلا كان التعليم ناجح غادي إكون المجتمع ناجح، لأن التعليم هو ركيزة المجتمع، أساس الدولة الحديثة، بيه كانكوّنوا مستقبل شعب “برمته”، هو اللي كايوفـّـر الطاقات البشرية اللي كاتشغل الناس من بعد فى الشركات، المصانع، مرافق الدولة، جميع الشعوب المتقدمة كاتركز على التعليم قبل من كول ّ قطاع حكومي، بيه كانكوّنوا “رجال ونساء الغد”.
السياسة الناجحة هي إخاطبونا هاد الناس بلغة ساهلة، مفهومة، ماشي بلغة خشينة كولـّـها حطب أو خشب، غير كانشوف مصطفى الخلفي كانعرف “بــَـرْطية” جديدة من البروباڴاندا راها فى الطريق، بحال إيلا عايشين فى كوريا الشمالية، كانضفي التليفيزيون بالزربة لا إضرّني راسي، لأن خطابو ما كايعرف لا نقطة، لا فاصلة، لا علامة ستفهام، بحال إيلا راه فى المسيد معرّضو الفقيه أو قطيب د الزّيتون فى يدّيه، السياسة هي تعرف أتــّـعامل مع مشاعر، حواس المواطنين، تسلب القلب أو العقل.
علاش نجح “مارتين لوتر كينـڴ” أو كايتـعـتابر خطابو آية من الخطابات السياسية الناجحة فى العالم؟ لأنه خاطب الناس بلغة بسيطة، كايفهموها، ركز فيها على حواسهوم، مشاعيرهوم، حتارمهوم، حنا بالرب إيلا هادوا ما كايحتارمونا، على سبيل المثال هاد الخلفي اللي كايخاطبنا بحال إيلا كايضربنا بفليطوكس أو الرصاص، عن طريق الحواس غادي يمكن لينا ندركوا بأن حنا فى صلب الإهتمام ديال هاد الساسة، ماشي إيلا قراوْا علينا خطابات جوفاء، لا حنا لا هوما واردين فيها، ولا ّ باغيين هاد الناس إنـوّمونا أو إكرّهونا صحـّـة فى السياسة، ولو نختالفوا مع بن كيران فى كثير ديال المجالات، ضروري نعتارفوا أنه هو الوحيد اللي عرف لحد الآن إوظف بشكل فطري حواس الناخبين، هاد الشي ما كايدلـّـش على أنه بغيناه يرجع، غير يبقى فى دارو حسن ليه.
السياسة الناجحة ماشي هي السياسة اللي غير كاتحسـّـن وضعية المواطنات أو المواطنين، ولاكن كاتساعدهوم كذلك إرجعوا حسن، فى هاد الحالة غادي نتاخذوا ساستنا كاقدوة، مع الأسف ما حـدّهوما هاكدا من المستحيل نتبعوهوم فى حماقهوم، السياسة الناجحة هي لمــّـا النخبة السياسية كاتـعرف أتــّـجاوب، أتـــّـعاطف مع مشاكيل المواطنين، كاتدافع بشراسة على العدالة الإجتماعية أو كاتوفــّـر إطار، لا قانوني ولا بيئي، فاين السعادة، العيش الرغيد أو جودة الحياة متوفرين.
السياسة الناجحة هي الإعتراف بالتعددية، لأن فى أو الأمر حنا أفراد، ماشي كتلة من لحم أو شحم ما عندها ساس ولا راس، أو كانبيغيوْا يحترامونا الساسة كأفراد، ماشي كاأشباح، قبل ما نكونوا طوال، قصار، عراض، عندنا ميولات، تطلعات، هوايات، هتمامات، أفكار خاصة إلخ.
السياسة الناجحة هي اللي قايمة على الخلافات المجدية، النقد البناء، هاكدا غادي يمكن لنيا نعيشوا، نتجاوبوا مع التعددية بسلاسة، أو باش نفـعــّـلوا هاد التعددية ضروري نكونوا كانتوفــّـروا على فضائل أو قيم، الإحتجاج أو المقاومة المتحضرة هوما بنزين السياسة الناجحة، وإلا ّ كونــّـا عايشين تحت رحمة نظام غير ديمقراطي فاين الحكم المطلق عامل ما بغى فينا، أخلاقيات سياسة الدولة هي توفير النظام العام، أخلاقيات السياسة المواطنة هي التغيير على يدّ المجتمع الوطني.
