د. مراد علمي
أستاذ جامعي، كاتب ومترجم
التــّصاور اللي كانشوفوا اليوما فى تركيا كاتفـكــّـرني فى سنوات القرطاس أو الباروض اللي عرفات تركيا شحال هادي، هجمات منظمة أو منتظمة ضد الخصم السياسي، العافـية أو الدخان فى مقرات أحزاب المعارضة، المقاومة المسلحة فى جنوب تركيا أو محاصرة مدون أو جهات كولــّـكها من طرف الجيش التركي، باقي ما نسيناش الثمن اللي دفعات تركيا من أجل الإستقرار، قتيلة كثر من 000 40 شخص أو جرح أو تشريد كثر من 000 100 عائلة.
أردوغان أو أخــّـوتــو ماشي هو اللول اللي كايلعب بالنار أو كايحاول يشعل فتيلة العافية فى نزاع قبلي، طائفي محض، بين الترك أو الأكراد، باش يحشد الجماهير من موراه، الترتيبات السياسية ديال هاد الحزب واضحة، ما فيها لبس: باغي يجعل أردوغان من نظام برلماني نظام رئاسي باش يتوفـر عـْـلى صلاحيات شبه مطلقة، على حساب شـهـوتـو أو هـْـواه، بحال إخوان المغرب اللي كايحملوا نفس التسمية أو المشروع المجتمعي بغية التسلط ، التحكم فى الدين (قلب الطيبين) أو من بعد فى الدولة “عن كاملها”، أو هوما اللي فتحوا بيبان البلاد على مصراعيها لــَـجميع منتوجات “آتا تـورك” حتى رجعات بعض الأسواق المغربية “بازارات تركية”، ولا ّ كـفـس “أسواق خـوردة”، أو الطامة الكبرى هي أن بعض المدارس الخاصة التركية توغلات فى المجتمع المغربي أو رجعات حلقة من حلقات التواصل اليومي، التلقين، التثقيف أو التدريس حتى شكلات خطورة غير مسبوقة على الثقافة، الحضارة أو الهوية المغربية.
بن كيران أو أخـــّـوتـو ما عمـّـرهم دافعوا على المغاربة ولا ّ المغربيات ولكن على مصالحهم الحزبية الآنية، لا غير، فضيحة أحمد منصور، صحفي الجزيرة أو الإخوان، أحسن دليل، أمـّـا بوسات جـْـناب الملك سلمان السعودي على الكتف ليمني أو ليسري ما كاتدلّ غير على خـدمة منظمة الإخوان العالمية، لأن هاد الدولة زوّدات الجنرال السيسي بالملاير ديال الدولار باش يحسق الإخوان المصريين، بؤر الشغب، التوتر، البلبلة أو الإسلام السياسي المتطرف، بوسات بن كيران ما هي غير نوع من الإستعطاف أو التضرّع، يعني “تــْــكايس ليــّـا عـفاك على عشيرتي”، أمـّـا الإشارة السياسية القوية الثانية هي عبارة عن تمرير خطاب سياسي واضح كايقول: “أنت ملك، ملك”، جوج بوسات، أو الفاهم يفهم، أو لوخريـن ماشي مـلـوك زعـما؟ هاد الخطوة جات من بعد ما عطى ملك البلاد تعليمات ألــْـبن كيران، مفادها: ما يبقاش يستعمل فى خطابو السياسي سمية الملك ولا ّ المؤسسة الملكية، من الإستحواذ على الدين، جات دابا نوبة ْ الدولة، هادي إهانة غير مقبولة، لا للشعب المغربي فى أول الأمر لا ألــْــرموز الدولـة، المفردات اللي كانستعملوا، الحركات اللي كانقوموا بيها، ولوْ تكون عفوية، غادي ديما تفضحـنــا، يمكن لينا نتحايلوا على الناس، ولاكن ماشي على ذاتنا!
الصراعات المفتعلة ديال هاد الحزب بحال ديال أردوغان اللي باغي إهمـّـش الحزب الـكردي اللي حرز على %10 ديال الأصوات أو شد الطريق فى أوجه الإخوان التركيين باش ما إهيمنوش على مؤسسات الدولة أو المجتمع باسم الدين أو الملــّـة، حزب العدالة أو التنمية التركي بحال حزب العدالة المغربي، فى عوط ما يجمع الشمل، إوحـّـد البلاد أو العباد شتت المجتمع أو قسمو على جوج: ها المومن، ها الكافـر، ها والي الله، ها عاصي الله أو الرسول، ها الصالح، ها الطالح، ها الفساد، ها الإصلاح، ها الكذوب، ها الصراحة، ها الإخلاص، ها النفاق! بالطبع بهاد الخطاب السياسي الساذج يمكن ليك تهزم، تخـدّر قلوبة أو عقولة الطيبين ولا ّ حتى الطبقة المتوسطة اللي عـْـيات من أوجوه النحس أو “سيديـيات” رجال السياسة التقليدية المشروخة اللي باقيين كايكذبوا علينا ليومنا هادا: بلا حيا لا حشمة كايتكلــّـموا حتى هوما على الإصلاح أو محاربة الفساد، ولوْ هوما طرف منــّـو أو قابلين يتعاقدوا حتى مع “شيطان إسلامي” ياك ما يضمن ليهم شي “كــْـريسي” حتى ينساهم التقاعـد.
الإسلام السياسي غادي ديما يبقى خطر فــتــّـاك لأنه ما كايآمنش بالديمقراطية الحقيقية، التعـدد، حرية العقيدة، التكافـؤ فى الفـرص (فى عوط ما إضبــّـر ألــّـعاطلين، لولاد المحرومين أو المسحوقين على الخدمة، كاينصحهم إسـبــّـحـوا ميات مرة أو إقـولوا : “هذا من فضل ربـّـي”)، العدالة، الكرامة، التحرر، أمـّـا تحقيق الذات ولا ّ الحريات الفردية كايعتابرها غير خزبلات غربية، ولو هي فى العمق مكتسبات كونية أو كاتــّـماشى مع تطلعات الفرد كثر من تطلعات أو سيطرة الجماعة اللي هي فى الأصل بوصلة أو ركيزة الإسلام السياسي، أو هنا كاتكمن معضلة الإسلام السياسي: ما إقـدّش إنـقــّـز فـوق ضلــــّـو، أو جميع الصراعات اللي كاتعرف الدول العربية ولا ّ شمال إفريقيا مرتبطة بالدين، بالإسلام السياسي: العراق، السنة ضد الشيعة، اليمن، فلسطين (فتح/حماس)، البحرين، الجزائر، السودان، سورية، لبنان، السعودية، ليبيا، تونس، مصرة، أمــّـا المغرب ما غادي ينجى من حمى الإسلام السياسي غير إيلا عرف كيفاش يتعامل، يخلق ميكانيزمات جديدة بغية ردع حماس، غلو، طيش أو بطش هاد التيار السياسي العنصري، المتـزّمت، نتخابات 4 شتنبر ما كاتشكــّـل غير مرحلة قصد “الإستمتاع بنشوة الفـوز” أو اللي نتظر كثر من 20 عام حتى جات نـوبـْـتـو يمكن ليه يتسنــّى عشرين عام اخرى حتى يطغى على جميع مفاصل الدولة، الله بوحدو اللي عالم شنو بغاوْا هاد الناس، الخير لــَـجميع هاد الشعـب، أبـدًا!
